Querela diuina
O man vnkynde
Hafe in mynde
My paynes smert
Beholde and see
Þat is for þe
Percyd my hert
And yitt I wolde
Or þan þu schuld
Þi saule forsak
On cros with payne
Scharp deth agayne
Ffor þi luf take.
Ffor whilk I aske
None oþer taske
Bot luf agayne
Me þan to luf
Althyng abofe
Þow aght be fayne

Responsio humana
O lord right dere
Þi wordes I here
With hert ful sore
Þerfore fro synne
I hope to blynne
And grefe no more
Bot in þis case
Now helpe þi grace
My frelnes
Þat I may euer
Do þi pleser
With lastyngnes
Þis grace to gytt
Þi moder eke
Euer be prone
Þat we may alle
In to þi halle
With ioy cum sone
Amen.