“Oy, kani suki nindot lagi ni, kinahanglan gyud ko nimong mapahangyo niini”, ang paray’g ni Mira sa tindira sa usa ka Antique Shop.
Mamalitay og antique collections si Mira og iya kining usa sa mga actibo nga hobby gikan siya na byuda sa linghud nga edad nga 30. Gani, ubay-ubay na ang antique collection sa byuda sukad sya nagsugod niining iyang passion, lima na ka tuig ang nilabay. Nagkada-iya ang iyang mga collections, gikan sa mga gagmay’ng butang sama sa post-war coins ngadto sa nagkada-iyang mga table pieces.
Usa ka talagsa-ong ornamental jar ang na-ibogan ni Mira sa iyang antique shop nga suki sa IT Park sa Lahug. Kini gibana-bana nga nabuhat pa sa panahon pa nga wala pa ni-abot ang mga kastila sa atong kadagatan. Usa ka butang nga nakamahal nianing butanga kay sama sa bago pa gyud kining ginama, walay tipak, walay liki, walay tatsa nga bisan gamay.
Sa una pa lang nga pagkakita ni Mira sa ornamental jar, sama sa siya gisigi og kaway niini para paliton. Nasulod na sa huna-huna ni Mira nga dili gyud siya mobiya sa antique shop hangtud nga dili niya mapalit kining butanga.
“Sige nalang ki, ihatag nalang ko ni sa imoha og 8,600, pero sa imoha lang ni siya ha, kung uban pa to ako gyud ni syang ibaligya sa 10,000”, tubag ni Mrs. Tinang nga tag-iya sa shop, human sa dugay-dugay nga hangyo ni Mira.
“Yehey! Salamat gyud Madam ha, naka-uyon man gyud gud ko aning jar nimo oy sa una pa lang nako syang pagkakita”, ang malipayong tubag ni Mira.
Galing man, nadala gyud ni Mira ang ornamental jar sa iyahang panimalay sa usa ka subdivision sa Talamban. Iya kinig gibutang nga corner piece sa iyang living room.
Sa kabuntagon ni-ana, sayo nga namukaw ang iyang katabang nga si Inday Pinay sa amo.
“Maam, sus kakuyaw na gyud sa panahon karon, didto sa eskina naay gipatay! Ingon pa sa uban natong silingan, ungo daw ang nipatay ni-adto!”, asoy ni Pinay sa iyang amo.
“Ay sus Pinay, mga adik-adik nasad tingali na nga naka-tripping ang maoy salad-on ni-ana”, tubag ni Mira.
“Dili Maam, naa man gud daw nakakita sa ni-ataki sa biktima, ngil-ad daw kaayo og nawong ang nipatay. Naglagot gani ko sa sulti sa atong silingan nga naa sad daw silay nakit-an nga tao nga nigawas gikan sa ato-ang balay mga lapas na sa alas-dose kagabii”, ingon ni Pinay.
“Pinay, nasuya lang na sila nato kay dili man kita mag-apil apil sa mga chismis sa atong palibot. Pasagdahi lang na sila”, hinay nga tambag ni Mira ngadto sa iyang katabang.
Unang gipangita ni Mira human sa ilang istorya ni Pinay mao ang jar nga bago lang niyang napalit. Kani iyang nabantayan nga medyo na-irog gikan sa iyang gibutangan kagahapon.
“Pinay, imong gi-irog ning jar?”, pangutana ni Mira.
“Wala Maam oy! natulog naman ko dayon paghuman nato og arrange sa living room gabii”, tubag ni Pinay.
Dako kaayo ang hibolong ni Mira pero iya nalang kining gibale-wala.
Sa kagabhi-on ni-anang adlawa, dugay nakatulog si Mira tungod sa asoy sa iyang katabang nga si Pinay. Mao nga tungod niini, nakadesisyon si Mira nga huwaton niya ang alas-dose nga takna og tan-awon niya kung tinu-od ba ang duda sa iyang huna-huna.
Tu-od man, sa pag-abot sa alas-dose sa tungang gabii, hinay-hinay nga nikana-og si Mira gikan sa iyang lawak og iyang gi-obserbahan ang jar nga naa sa iyang living room. Dili makatu-o si Mira sa iyang nasaksihan sa iyang pagtan-aw sa iyang living room. Susama sa may bugnaw nga hangin nga nigakos sa iyang tibook lawas og nanindog ang balahibo niini sa iyang tangkogo og iyang mga bokton.
Pipila ka gutlo sukad niyang pagbantay sa iyang jar, kalit nga may ulo nga nibutho sa iyang ornamental jar. Walay sama nga ka-itom ang buhok niini og pirting pagkaputi sa panit. Dagko kaayo ang mga mata og sama sa kalayo ang kapula sa kolor niini.
Nidagan si Mira pa-ingon sa switch sa suga sa iyang living room bitbit ang usa ka dos por dos nga pirmi tapad niya kada gabii. Iyang dali nga gipasiga ang suga sa iyang living room aron maklaro niya ang tao nga nigawas gikan sa iyang ornamental jar.
“Leche ka! Unsa man ang imong gibuhat diha sa akong ornamental jar! Nag-unsa man ka diha………Pinay!?!”, singgit nga pangutana ni Mira sa tao nga nibutho gikan sa iyang ornamental jar.
“Nindot man gud kaayo diri Maam oy, bugnaw kaayo unya puslan man ari ko matulog sa folding bed dapit sa atong kusina, diri ko matulog sa jar kay lagi bugnaw kaayo! Pero dili raman sad ko magdugay diri og istambay Maam, kay sa taud-taud init naman diri unya mo text ra ba to si Ondung nako og “gud nyt” nga kinahanglad sad akong matubag”, tubag nga pahiyom ni Pinay.
“Sunod Pinay, dili nako gusto pa nga anha ka sa jar matulog ha! Palitan nalang tika og aircon sa imong lawak ugma!”, lagot nga sulti ni Mira.
Human ni-adtong higayona, nibalik og katulog si Mira sa iyang lawak. Sulod sa huna-huna niini ang dako nga kahimoot sa gibuhat ni Pinay.
Tu-od man, pagkabuntag dayon gipalitan gayud ni Mira ang iyang katabang og 1-horse-power aircon para sa lawak niini. Samtang padulong na usab si Mira pauli sa iyang panimalay, iyang nabalita-an nga usa diay ka akyat-bahay gang member ang nasikop isip suspetsado sa pagpatay nga nahitabo sa ilang subdivision sa nilabay nga adlaw. Asoy pa sa mga silingan nila ni Mira, dariyot na gyud nga mabiktima sa ni-aging gabii ang panimalay ni Mira sa akyat-bahay kung dili lamang nahadlok ang mga kawatan sa dihang may nakita silang mura og ungo nga nibutho gikan sa banga sa living room….
Posts
