Tida

I dag tenkjer eg det passar godt med eit dikt om tida... Eg ynskjer deg eit godt nytt år!

Fotspor

Mine fotspor i verda

så usle og små

og så lette å viske ut

Snart vil dei forsvinne

alle som eitt

og den evige sommarsola

vil skjule sjølv minnet

Likevel er fotspora mine

viktige for nokon

det er ikkje likegyldig

kor eg set dei, eg veit

Ved sidan av spora er andre

vi høyrer saman

(meir eller mindre)

og nokon ville sakna mine

Julemorgon

Det er laurdag morgon

eg har ferie, har nettopp stått opp

I stova står juletreet

stjerna heng i vindauget bak meg

på bordet står eit einsleg stearinlys

Det luktar klementin

stearin

og gran

Borna ligg på golvet

berre to meter i frå meg

og ser på leikebilar

[og kranglar om leikebilar

slåss om leikebilar

blir einige om leikebilar

-

finn på noko anna å krangle om]

Dei har endå ikkje fått på seg klede,

auga er søvntunge, håret prega

av julenatta som no listar seg ut

på filttøflar

vinkande, smilande:

eg kjem tilbake

med kvile og ro

når dagens leikar er leika,

klementinbollen er tom og

stearinlyset har brunne ned!

Nyt dagen, vesle poet;

den kjem aldri tilbake

Gleder

Tusenkanten

Kva er det verkelege meg
kva for ei side
er den eigentlege eg?

Er det kollegaen
som sit over bøkene og jobbar
Er det kollegaen
leande på lunsjrommet
Er det faren
travel på veg til barnehagen
Er det faren
ved middagsbordet?

Kanskje eg er mannen
som vaskar golvet
Kanskje eg er elskaren
under tynne sommardyner
Kanskje eg er lesaren
med bokposen på biblioteket
Kanskje eg er skrivaren
knatrande på niogtjue plastknottar?

Eller er eg broren
smilande på telefonen
Eller er eg sonen
han som endå er liten
- i nokon sitt hovud
Eller er eg svigersonen
den nye vinden, nysgjerrig vakta
av håpefulle hjarte?

Er eg ungdomsleiaren
Er eg kunden i kassa på Joker
Er eg bedehusmannen
Er eg kameraten
Er eg han
Er eg den
Er eg ein
Er eg nokon
Er eg meg
Kven ser du?

Ikkje set meg i bås, er du grei;
Gjer du det
set du fingeren
på den eine sida
i tusenkanten meg
og seier:
det er deg! 


(Bilete måla av mi tre år gamle dotter!)

Kvite dagar

Julenatt

Ynskjer alle besøkande i Mørkerommet ei god jul!

 

Englesang
Nok ein gang
Syng vi ut med himmelsk klang

Fred på jord
Ei gleda stor:
De har fått ein himmelsk bror!