Hilda hoodie

 Ég saumaði mér þriðju flíkina eftir sniðinu Hilda hoodie frá Ida Victoria. Núna hafði ég hvorki hettu né háan kraga heldur bara mjótt stroff í hálsinn, og stytti ermarnar í 3/4 lengd því ég kippi alltaf ermum upp ef þær eru í fullri lengd og gengur misvel að halda þeim uppi. Þá er bara eins gott að stytta þær. Ég síkkaði þennan peysukjól eins og þá fyrri, en er jafnvel að spá í að stytta hann aðeins. Sé til með það. Kjóllinn er að öllu leyti saumaður á overlockvélina og efnið keypt í Noregi.

Hilda Hoodie

Ég hef áður saumað mér svona eins konar peysukjól eftir þessu sniði. Núna hafði ég hann með hettu og úr venjulegu bómullarjerseyi. Hafði líka ermarnar aðeins styttri. Önnur breyting sem ég hef gert á báðum er að hafa kjólinn sjálfan lengri en mjókka aðeins stroffið að neðan. Þessi verður fínn í húsbílaferðalög sumarsins.

                      Sniðið heitir Hilda Hoodie og er frá Ida Victoria, og ég keypti efnið hjá henni líka.

Jerseykjole med sving for barn

Ég sting oftast einhverju mjúku með í jólapakkana handa ömmubörnunum, yfirleitt náttfötum. Núna datt mér allt í einu í hug að sauma á þau öll. Ég vissi af sniði af kjól frá Ida Victoria en hafði aldrei hugsað út í að ég gæti saumað hann á stelpurnar. Sniðið er í stærðum frá 74 upp í 146. Ég dreif mig í að panta sniðið og efnið í nóvember og náði að sauma í tæka tíð.

Fjögurra ára ömmustrákurinn fékk svo bol. Ég tók mál af honum þegar hann var hjá mér án þess að hann fattaði neitt hvað væri í gangi og gat þannig haft bolinn síðari en sniðið sagði því drengurinn er frekar langur og grannur.

Þær mættu allar í kjólunum í árlegt jólaboð fjölskyldunnar milli jóla og nýárs, og sem betur fer pössuðu þeir vel. Ég á ekki mynd af piltinum í sínu því eins og sönnum herramanni sæmir kom hann í dökkum buxum, hvítri skyrtu, í vesti og með slaufu í boðið.

Sniðið er sem sagt Jerseykjole med sving for barn frá idavictoria.no og efnið pantaði ég frá stofflykke.no. Sniðið af bolnum er Onion snið 20047 (hef áður saumað nokkra kjóla á stelpurnar eftir kjólasniði úr sama pakka) og efnið fékk ég í Föndru.

Stærðin á 8 ára stelpurnar er 140 og á þá 6 ára 128. Bolurinn á 4 ára strákinn er í stærð 116.

 

Victoriakjolen aftur

Þegar ég finn gott kjólasnið þá sauma ég gjarnan fleiri en einn. Saumaði hann fyrst úr viscosaefni sem ég hafði átt lengi. Núna notaði ég bómullarjersey. Hann varð því aðeins þykkari og hlýrri, en mjög fínn. Þegar ég tók myndina var birtan erfið og liturinn er ekki svona blár, hann er grárri og ljósari.

Efnið pantaði ég frá Noregi, og ég verð að segja að það er aldrei leiðinlegt að fá svona sendingu.

 

Victoriakjolen

Það var alveg kominn tími til að bæta einum kjól í safnið. Efnið hef ég átt í nokkur ár, viscose jersey sem ég keypti í Föndru fyrir þó nokkrum árum. Fer mjög vel með þessu sniði.

Sniðið keypti ég hjá hinni norsku Ida Victoria sem ég hef verslað nokkrum sinnum við. Ég hef verið mjög ánægð með allt sem ég hef keypt hjá henni. 

Til að prófa sniðið saumaði ég prufukjól í minni stærð, síkkaði efri hlutann sem nam stærstu stærðinni, bætti við pilssíddinna og allt smellpassaði. Notaði gamalt jersey teygjulak til verksins.

 

Hilda hoodie

 Ég hef verið í smá fatasaumastuði í sumar, og það er m.a. því að þakka að þessi peysukjóll varð til. Reyndar er þetta hettupeysusnið, en ég valdi að sauma frekar kraga en hettu og að hafa þetta frekar kjól en peysu og síkkaði hann því aðeins. Það er hægt að hafa vasa framan á, sem ég sleppti. Ermarnar eru dálítið langar samkvæmt sniðinu, þær eiga að vera það, en það er hugsanlegt að ég stytti þær seinna. Ég kippi alltaf ermum upp og þær eru heldur efnismiklar til þess. Hann er hlýr og þægilegur og bíður haustsins.

Efnið, sem er French terry, keypti ég í Litlu músinni á Akranesi, en stroffefnið í Föndru. Sniðið pantaði ég frá hinni norsku Ida Victoria. 

Sumarkjóll

 Nýverið kom sumarkjóll undan nálinni hjá mér, eða nálunum réttara sagt því ég renndi honum í gegnum overlock og coverlock vélarnar. Ég notaði gamla, góða Onion 2035 sniðið mitt sem ég er búin að aðlaga aðeins að mínum vexti. Þarf að síkka berustykki aðeins að framan og taka úr saumnum þar sem ég sauma saman bakstykki og berustykki. Passar vel þannig. Maður á aldrei of mikið af kjólum, er það? Ég á allavega efni í fleiri.

Efnið, sem er bómullarjersey, pantaði ég að utan.

Þrír prjónakjólar - Veslemor-tunika

Það kom að því að ég prjónaði þessa kjóla á stelputríóið mitt. Búin að eiga uppskriftina lengi í bókinni Klompelompe, strikk til baby, barn og voksen. Held að það sé fyrsta bókin þeirra. Langaði að prjóna þá fyrir þann aldur sem þær eru á núna, sú yngsta að verða fjögurra ára og tvær elstu að verða sex.

 Það var sérlega gaman að prjóna þá, byrjað efst og þess vegna gott að máta síddina. Ég notaði garnið sem gefið er upp í uppskriftinni, Dale Lille Lerke, keypt í A4, og prjóna nr. 3. Stærðirnar eru á 3-4 ára og 5-6 ára.

Náttkjólar og dúkkukjólar

Mig langaði að stinga náttfötum í jólapakka ömmubarnanna og þá kom í ljós að tvær af ömmustelpunum mínum, systurnar, vilja bara sofa í náttkjólum núorðið. Þess vegna var bara einfaldast að sauma þá sjálf og notaði ég sama snið og á leikskólakjólnum sem ég skrifaði um í síðustu færslu, Onion 20047. Efnið fékk ég í Föndru, lífræna bómull. Stærri kjólarnir eru í stærð 116 á fimm ára stelpurnar og sá minni í stærð 104 á þriggja ára dömuna. Þær sváfu allar þrjár í kjólunum sínum á jólanótt. Litli prinsinn fékk líka náttgalla en amma keypti hann.

Svo tilheyrði að sauma kjóla á dúkkubörnin í stíl. Sniðið af þeim er úr bókinni Sy og strikk dukkeklær eftir Anne Grethe Gaaserud.

 

Leikskólakjóll

 Í byrjun aðventu saumaði ég þennan kjól á eina ömmustelpuna sem átti “ekkert til að fara í” á leikskólann. Hún hafði nefnilega séð skólasystur sína í kjól sem minnti á jólin og langaði í eitthvað svipað. Pabbinn vildi leysa málið en vissi ekki hvar hann ætti að kaupa kjól og var að auki á kafi í prófum. 

Hann hringdi því í ömmuna sem reddaði málunum í hvelli, keypti efni í Litlu músinni og fékk það með pósti fljótt og vel og útkoman varð þessi kjóll. Ég vildi ekki hafa jólamótíf í munstrinu heldur nota rauðan og hvítan lit til að gera hann jólalegan. Barnaefnin frá Litlu músinni er alveg æðislega falleg og úr lífrænni bómull, meðhöndlaðri án eiturefna.

Sniðið er hið klassíska frá Onion nr. 20047, og stærðin er 116.

Kjólar

  

Ég sauma mér föt öðru hvoru og hef alltaf gert. 

Það mætti samt halda að ég teldi það ekki til handavinnu því mér dettur oft ekki einu sinni í hug að sýna það hér eins og aðra handavinnu sem ég geri.

En ég ætla að bæta úr því og sýna þessa tvo kjóla sem ég saumaði í vetur og vor.

Sá svarti er mjög paktískur að skella sér í, og líka fínn undir kimono.

Munstraði kjóllinn er sumarkjóllinn í ár.

Báðir eru eftir sama sniði, Onion 2035, sem er uppáhalds hjá mér, og er ég búin að gera breytingar á berustykkinu til að hann passi betur.

Efnin eru bæði úr Föndru.

Prjónaður stelpukjóll

Ég var að ljúka við að prjóna jólakjólinn á yngstu ömmustelpuna mína.

Hún er rúmlega tveggja og hálfs árs.

Í Klompelompe strikkefest er uppskrift af peysu, og það var hugmynd tengdadóttur minnar að ég tæki þá uppskrift og síkkaði þannig að úr yrði kjóll.

Ég prjónaði stærð þriggja ára, en fitjaði upp á fyrir stærð fjögurra ára til að fá meiri vídd í pilsið, en tók svo bara meira úr fyrir berustykkið og prjónaði það ásamt ermum fyrir þriggja ára stærðina.

Í uppskriftinni er notað ullargarn, en við vildum hafa hann úr bómull, og Mandarin petit er eina bómullargarnið sem ég þekki sem er gott að nota í staðinn fyrir ullargarn á prjóna nr. 3.

Það er uppáhaldsbómullargarnið í raun og hef ég prjónað úr því í áratugi.

Dalíukjóll

Þetta er kjóll á eina ömmustelpuna, sem verður fjögurra ára í júlí. Hún er kjólastelpa, vill helst alltaf vera í kjól.

Uppskriftin er úr Prjónað af ást, og garnið heitir Drops Cotton Merino, keypt í Gallery Spuna.

Það er blanda af ull og bómull, og mér skilst að það dugi mjög vel í svona leikskólaföt. Ég sá flík í búðinni sem búið var að marg þvo, og það sá varla á henni.

Annar leikskólakjóll

Ég átti þetta rósótta jerseyefni, keypti það í Saumu til að nota í dúkkuföt.

Annarri tengdadótturinni langaði svo í kjól úr því á dóttur sína, svo amma saumaði auðvitað kjól.

Einlita efnið er úr Föndru.

Hann var nú svo sem ekki alveg nógu bleikur fyrir þá litlu, en hún notar hann samt..

Sniðið er Onion 20047, stærðin á 4 ára.

Leikskólakjólar

Ég fékk pöntun frá annarri tengdadótturinni upp á bleikan leikskólakjól. Litla daman vill bara fara í bleikum kjól í leikskólann og treður sér í alltof lítinn kjól á morgnana.

 

Auðvitað saumaði amma kjól, og annan á hina þriggja og hálfs árs dömuna sína, bara í öðrum lit.

 

Efnin eru keypt í Föndru, og sniðið líka, Onion 20047.

Stærðin er í 104, en þær verða fjögurra ára í sumar.

Tilda sommerkjole

Þetta eru jólakjólar þriggja ára stelpnanna minna í ár.

Uppskriftin er úr Klompelompe sommerbarn, og heitir Tilda sommerkjole.

Það var ekki auðvelt að mynda þá í skammdegismyrkrinu, og er annar djúpgrænn og hinn milliblár, alls ekki svona gráblár eins og myndin sýnir.

Fyrst ætlaði ég að nota Mandarin petit og var komin vel niður fyrir handveg á fyrri kjólnum þegar ég uppgötvaði litagalla í garninu.  Þá nennti ég ekki að taka annan séns og fór yfir í aðra garntegund, Capri frá Katia.  Það er heldur grófara, en kjólarnir komu ágætlega út.  Yfirleitt er ég mjög ánægð með Mandarin petit og var svekkt yfir að geta ekki notað það.  Mér finnst þetta Capri bómullargarn gefa frá sér svolitla ló, sem ég veit ekki alveg hvað þýðir.

En stelpurnar voru flottar í kjólunum, fín vídd neðst á þeim og flottir þegar þær snúa sér í hring.

Everyday dress

Í þó nokkurn tíma hef ég séð snið á netinu sem heita "Made by Runi".  

Mér sýnist þetta vera sænsk kona, búsett í Noregi sem rekur þetta fyrirtæki ásamt fjölskyldu sinni.

Mig hefur lengi langað til að prófa snið sem heitir Everyday dress, og lét ég verða af því fyrir nokkrum vikum að panta það.  Hún selur bæði útprentuð snið og rafræn á PDF skjölum sem maður prentar út og límir saman. Ég nenni því ekki og keypti því útprentað og fékk það sent, tók ekki nema viku að fá það hingað.

Grunnsniðið er heill kjóll í þremur síddum, eins og þessi efsti. Ég saumaði hann í mestu síddinni. Allar brúnir eru kantaðar með stroffefni.

Svo selur hún svoköllur "Add on" snið, en þá notar maður grunnsniðið af efsta kjólnum, en breytir efri hlutanum, og þá er hægt að hafa ermar (þrjár síddir mögulegar) og annað efni í toppnum ef vill.

Ég keypti sem sagt Add on pakkann líka.

Af gráa efninu keypti ég tvær síddir, var ekki viss um að ein sídd dygði, sem hún reyndar gerði, og átti ég því efni í neðri hluta á öðrum kjól, og bætti svörtu við að ofan og í ermar.

Þá sá ég að afgangurinn af svarta efninu dugði í stutterma efri topp, og í neðri hlutann setti ég efni sem ég hef átt lengi, og bryddaði með rauðu stroffefni, en hafði svart neðst.

Þetta snið býður upp á alls konar samsetningar.

Kjólar

Eins og ég sagði í síðustu færslu þá ætla ég að vera duglegri að sýna fatasauminn minn.

Ég er kjólakona, og hef saumað mest eftir Onion sniðum síðasta áratug.

Kjólinn hér að ofan er ég nýbúin að sauma, Hann er úr einskonar crepe jersey efni, aðeins teygjanlegu, en mjög þægilegu að vera í. 

Sniðið heitir Onion 2035, og hef ég saumað nokkra kjóla eftir þessu sniði.

 

Þennan saumaði ég fyrr í sumar, sem rósóttan og léttan sumarkjól.  Hann er úr svipuðu efni og hinn, og notaði ég líka snið frá Onion, snið 2017.  Það er ekki lengur á síðunni þeirra, svo ég get ekki sett tengil í það.  Ég hef líka saumað nokkra kjóla eftir þessu sniði, og hafa þeir passað mjög vel.

Efnin í báða kjólana voru keypt í Föndru og sniðin voru líka keypt þar fyrir mörgum árum.

Skokkar

Nú eru ömmustelpurnar mínar búnar að fá skokk í afmælisgjöf, en þær áttu allar afmæli í sumar.

Uppskriftin heitir Tankestreg, og fæst hún í Litlu Prjónabúðinni, og sömuleiðis garnið, sem heitir Geilsk bomuld og uld.

Blái skokkurinn er í 2 ára stærð, og hinir 4 ára.

Bæði uppskriftin og garnið gerðu það að verkum að mjög gaman var að prjóna þá.

Little Sister's Dress

Ég hef átt uppskriftina að þessum kjól í mörg ár, og prjónaði hann á litla frænku fyrir nokkrum árum.

Og nú var röðin komin að ömmustelpunum þremur. Stærri kjólarnir eru á tveggja ára og sá litli á eins árs.

Ég hafði þá alla eins, því ég á svo erfitt með að gera upp á milli í litum, nema ég sé beðin um ákveðna liti.

Kjóllinn er prjónaður ofanfrá og niður.

Ég notaði Mandarin petit og uppskriftin er ókeypis á Ravelry.