Skólapeysur

Það var alveg kominn tími á að prjóna nýjar peysur á litla flokkinn minn. Nú eru börnin 5, 7 og 9 ára og ég þurfti að róa aðeins á önnur mið en venjulega eftir uppskriftum út af elstu stelpunum. Fyrr á árinu keypti ég bókina Skólapeysur sem Prjónafjelagið gaf út. Stærðirnar í henni eru fyrir 6-14 ára.

Þar valdi ég uppskriftina Selás til að prjóna eftir á stelpurnar. Ég var hins vegar með fínna garn en gefið er upp þannig í stað þess að fara eftir lykkjufjölda í stærð 10 ára fitjaði ég upp fyrir stærð 12 ára á þær elstu en hélt sídd á ermum og bol fyrir 10 ára. Það sama gerði ég hjá þeirri sjö ára, fitjaði upp fyrir 10 ára en hélt sídd fyrir 8 ára. Notaði uppgefna prjónastærð, no.6.

Þetta heppnaðist, allt passaði vel á þær. Hafði hálsmálið líka lægra og víðara en í uppskriftinni.

Mér hefur aldrei fundist gaman að prjóna upphækkanir með stuttum umferðum en þessi uppskrift bæði byrjar og endar á upphækkunum. Hins vegar fann ég íslenskt vídeó með aðferð sem gekk svona svakalega vel hjá mér að nota að upphækkanirnar urðu það skemmtilegasta í prjóninu.

Fimm ára pilturinn fékk peysu eftir uppskrift úr bókinni Prjónað af ást eftir Lene Holme Samsøe. Uppskriftin heitir Uppáhaldspeysa Sveins, stærð 6 ára.

Og hér eru allir komnir í peysurnar…..

Ég notaði Drops Air í stelpupeysurnar og prjóna no.6 og Drops Merino Extrafine í strákapeysuna. Öll börnin völdu sjálf lit fyrir sig.

 

Bangsaföt

Ein ömmustelpan bað mig um að prjóna peysu á hana Sissý, uppáhalds bangsann sinn. Hann fékk því að verða eftir hjá ömmu til að hún gæti bjargað málunum. Stelpan skaffaði garnið sjálf, eitthvað sem hún hafði gert í frístund í skólanum og vildi rekja upp til að nota. Það dugði ekki í peysu svo ég notaði það í húfu og fann annað garn í peysu.

Þá kom félagi þessa bangsa og vildi líka fá peysu og húfu, enda eigendurnir systur. Amma dreif það af líka.

Svo stigu fram fleiri bangsar frá öðru heimili og báru sig illa vegna fataleysis, enda vetur að ganga í garð, svo prjónarnir tifuðu áfram.

Ég var nú bara orðin ansi góð í þessu fyrir rest. Anatómía svona hundabangsa er engu öðru lík, mjög breitt bak og örmjó bringa, en svakalega eru þeir krúttlegir í svona peysum. Öll fjögur fengu föt á a.m.k. einn bangsa í þessari umferð og allir ánægðir.

 

Karin hverdagscardigan

 Ég saumaði nokkrar peysur á mig í fyrra eftir sniði frá Ida Victoria sem heitir Karin hverdagscardigan. Ég fór varla úr þeim í fyrrasumar. Sniðið gerir ráð fyrir þremur síddum, og hafði ég þær allar síðar. Reyndar er ég búin að stytta ermarnar á þremur þeirra í 3/4 sídd af því að ég ýti alltaf ermum upp og í staðinn fyrir að berjast við að halda þeim uppi á handleggnum klippti ég bara af þeim (og faldaði, að sjálfsögðu). 

Ég átti afgang af gráa efninu og þegar ég fór að mæla sá ég að hann myndi duga í miðsíddina af peysunni. Hún er bæði styttri, nær niður á mið læri, og með styttri ermar, mjög þægileg sídd. Efnið dugði nákvæmlega í hana.

Aðalvík nr.5

Edit: Fyrri peysan fannst🙂

Þetta er ekki sama rauða Aðalvíkin og ég sýni hér neðar í blogginu, heldur ný peysa. Ömmustelpan sem hin var prjónuð á var ekki búin að eiga peysuna nema í tæpan sólarhring þegar hún hvarf af snaga í skólanum hennar. Síðan er liðinn einn og hálfur mánuður, og hefur ekkert til peysunnar spurst.

Amman tók uppskriftina aftur fram og gerði nýja peysu fyrir 7 ára skólastelpuna sína þegar þrjár vikur voru liðnar frá hvarfinu. Fyrri peysan var merkt með nafninu hennar, saumuðu á taumiða innan á stroffið.

 En þetta er sem sagt Aðalvík, stærð 6-8 ára, prjónuð úr Drops merino extra fine frá Gallery Spuna á prjóna nr. 4.

Aðalvík nr. 3 og 4

Þá er ég búin að prjóna eftir uppskriftinni Aðalvík frá Ömmu Loppu á öll barnabörnin fjögur.

Systurnar sem fengu þessar völdu sjálfar litina sem þær vildu hafa á peysunum. Þessi rauða er í stærð fyrir 6-8 ára, en sjálf er daman 7 ára.

Sú yngri valdi sér bleikt og hennar peysa er í stærð fyrir fimm ára, enda er hún fimm ára.

Garnið er eins og áður Drops merino extra fine, keypt í Gallery Spuna. Prjónað á prjóna nr. 4 og 3,5.

 

Aðalvík nr. 2

Fyrr í sumar prjónaði ég peysuna Aðalvík á yngsta barnabarnið og er færsla um það neðar á síðunni.

Þessa gerði ég svo á systur hans sem er nýorðin 7 ára. Hún valdi litinn sjálf, vínrauðan, og er hann töluvert dekkri en myndirnar sýna, kom svona skær út í dagsbirtunni. Er mjög fínn á henni.

Ég prjónaði stærð á 6-8 ára, hún er fallega síð á henni og passar vel. 

Garnið er Drops merino extra fine, keypt i Gallery Spuna í Hamraborg. Prjónastærðin er 3,5 og 4, og uppskriftin að sjálfsögðu frá Ömmu Loppu.

 

Hilda hoodie

 Ég hef verið í smá fatasaumastuði í sumar, og það er m.a. því að þakka að þessi peysukjóll varð til. Reyndar er þetta hettupeysusnið, en ég valdi að sauma frekar kraga en hettu og að hafa þetta frekar kjól en peysu og síkkaði hann því aðeins. Það er hægt að hafa vasa framan á, sem ég sleppti. Ermarnar eru dálítið langar samkvæmt sniðinu, þær eiga að vera það, en það er hugsanlegt að ég stytti þær seinna. Ég kippi alltaf ermum upp og þær eru heldur efnismiklar til þess. Hann er hlýr og þægilegur og bíður haustsins.

Efnið, sem er French terry, keypti ég í Litlu músinni á Akranesi, en stroffefnið í Föndru. Sniðið pantaði ég frá hinni norsku Ida Victoria. 

Aðalvík með húfu

Prjónaði duggarapeysu á litla manninn minn, sem verður 3 ára eftir rúman mánuð. Hafði stærðina á 4 ára og passar hún vel á hann. Prjónuð ofanfrá, sem mér finnst langbest þegar ég prjóna á börn. Pilturinn valdi sjálfur litinn sem er heldur grænblárri en á myndunum.

Svona merki ég allt sem ég prjóna á barnabörnin, enda týnist ekkert.

Skellti líka í húfu, en hún fylgdi ekki uppskriftinni. Studdist við uppskriftina Nordigjønå-lue sem er í Klompelompe vinterbarn, en notaði einn munsturbekkinn úr peysuuppskriftinni.

 Húfan er á 3-6 ára og prjónuð á prjóna 3 og 3,5, en peysan á prjóna 3,5 og 4.  Garnið er Drops Merino Extra Fine (hvað annað?), keypt í Gallery Spuna í Hamraborg og uppskriftin, sem heitir Aðalvík, er frá Ömmu Loppu.

 

Karin hverdagscardigan

Fjórða peysan sem ég sauma eftir sniðinu sem ég keypti hjá Ida Victoria. Nota hinar svo mikið að mér þótti sjálfsagt að bæta við einni bleikri. Yngsta ömmustelpan sem er mjög bleik og hefur mikinn fataáhuga sá mig fara í hana í gær og sagði strax: flott peysa, amma, viltu vera í henni í afmælinu mínu (sem er reyndar nýbúið), já, en þá bara í Ylfu afmæli….  Tek sko alveg mark á þessari dömu, reyni oft að vera í bleiku þegar von er á að hitta hana.

 Efnið er kallað vöfflujersey vegna vefnaðarins og er bómull með 5% teygju, en það teygist frekar mikið. Ég lét því saumaráðgjafann í Husqvarnavélinni velja rétta sporið til að falda með teygjuefni og hann valdi þetta spor. Efnið pantaði ég að utan.

Síðar peysur

Ég tók mig til um daginn og saumaði mér þrjár síðar peysur til að nota í sumar. Ekki það að ég eigi ekki nóg af prjónuðum peysum, mig langaði bara í þynnri og mýkri peysur.  Ég keypti snið sem ég hef lengi ætlað að eignast og saumaði prufupeysu úr efni sem ég keypti í töluverðu magni, hræódýrt, í Álnavörubúðinni í Hveragerði þegar hún var að hætta með efni. 

Sniðið smellpassaði, en það eina sem ég gat sett út á var að listinn að framan var heldur stuttur og kipraði peysuna aðeins kringum hálsmálið. Ég tók hann af, bætti 5 cm inni í hann og saumaði aftur á, og nú var hann miklu betri. Svo sleppti ég líka vösum sem fylgdu sniðinu, hef ekkert að gera við vasa á flíkum nema utanyfirflíkum eins og úlpum og kápum. Sniðið kemur í þremur síddum, og valdi ég þá síðustu.

Þótt þetta efni hafi verið ódýrt þegar ég keypti það, þá er það alveg þrusugott, og hef ég varla farið úr þessari gráu.

Næst var svo að gera aðra, verð að eiga bláa líka. Efnið í hana keypti ég í Litlu músinni og gerði mér ferð upp á Akranes til að kaupa það, á mjög erfitt með að kaupa efni án þess að koma við það fyrst. En efnin hjá henni eru mjög góð, og hef ég pantað tvisvar síðan og verið mjög ánægð. Þetta bláa er lífrænt bómullarjersey, mjög gott að vera í henni. Nota hana líka mikið.

Svo bætti ég við einni hvítri, passar vel að eiga eina slíka fyrir bjarta sumardaga. Efnið pantaði ég frá Litlu músinni og er það sams konar og bláa efnið.

Peysurnar voru saumaðar svo til eingöngu á overlockvélina, stakk bara axlarsauma og faldaði ermar í Epic vélinni.

Þetta spor úr Epic saumavélinni er mjög fínt til að falda jerseyefni og lokar kantinum að innan. Nennti ekki að taka fram coverlockvélina fyrir svona lítið.

Sniðið pantaði ég frá Ida Victoria í Noregi og tók það ekki nema viku að fá það í hús.  Huggulegt að fá svona fallegt kort með 🤍

 

Önnur golftreyja -Tynn Lilly-jakke

Þessi golftreyja er á aðra tæplega sjö ára ömmustelpuna mína, en hin sem er jafngömul fékk eins peysu í fölbleikum lit. Daman valdi sjálf þennan græna lit, fannst nóg komið af bleiku í fataskápnum sínum þegar við mamma hennar stungum upp á bleikum lit, og vildi breyta til. “Öll fötin mín eru bleik, herbergið mitt er bleikt…….”

Það er byrjað á berustykkinu og svo teknar upp lykkjur fyrir hálsmál og til að prjóna niður bolinn og ermarnar. Skemmtilegt að prjóna.

Uppskriftin er úr Klompelompe - Strikkefest. Garnið er Lanett og keypt í Rokku. Prjónarnir voru nr. 2,5 og 3, og í hnappalistana hafði ég þá nr. 2. Stærðin er á 8 ára.

 

Golftreyja - Tynn Lilly-jakke

Ömmustelpu, sem verður sjö ára í sumar, vantaði nýja golftreyju, var vaxin upp úr þeirri sem ég prjónaði á hana þegar hún var fjögurra ára. Sú peysa hefur verið í stanslausri notkun og tekur tæplega fimm ára systirin glöð við henni. En þessi sem ég prjónaði núna er úr bókinni Klompelompe - Strikkefest og heitir Tynn Lilly-jakke. Hún er prjónuð þannig að bekkurinn efst er prjónaður sem lengja, síðan eru teknar upp lykkjur  á efri kantinum og hálsmálið prjónað, svo er tekið upp á neðri kantinum og prjónað niður. 

 Peysan er prjónuð fram og til baka og fannst mér það dálítið puð, en fínt bíla- og sjónvarpsprjón.  Ég prjónaði úr Lanett, daman valdi sjálf litinn og uppskriftina. Prjónarnir voru nr. 3 og 2,5, og í hnappalistann notaði ég prjóna nr. 2. Stærðin er á 8 ára. 

Svona leit munsturbekkurinn út þegar ég var búin að bleyta hann og strekkja, og taka upp lykkjur fyrir hálsmálið. Í uppskriftinni er manni ráðlagt að pressa bekkinn, en mér finnst betra að bleyta prjón, pressa aldrei.

David jakke

Litli ömmustrákurinn, sem varð nýlega tveggja ára, er löngu vaxinn upp úr David jakke peysunni sem ég prjónaði á hann í stærð fyrir eins og hálfs árs. Hann notaði peysuna sem betri peysu, og við mamma hans vorum sammála um að best væri bara að gera aðra peysu eftir sömu uppskrift, okkur finnst hún flott. Núna hafði ég hana í 4 ára stærð, og kemur það ekki að sök þótt ermalengdin sé rífleg því þær eru frekar þröngar og haldast alveg uppi. 

Ég prjónaði úr Lanett og keypti tölurnar í Rokku. Uppskriftin er í Klompelompes sommerbarn.
 

Dýrafjör og Småtroll húfa

Ég prjónaði peysuna Dýrafjör frá Ömmu Loppu á 22 mánaða ömmustrákinn minn. Ég valdi fílamunstrið handa honum því mér finnst það mjög fallegt, en það fylgja tvö önnur munstur í bekkinn. Hann verður tveggja ára í september, en ég hafði peysuna í stærð fyrir þriggja ára. Ég hafði líka færri lykkjur i stroffinu fremst á ermunum og fínni prjóna til að fá það þrengra. Ermarnar tolla þá betur uppi.

Svo varð þessi húfa til í vikunni líka. Ég gerði svona húfu á systur hans fyrir nokkru í bleiku, og hann var eiginlega búinn að eigna sér hana, var svo hrifinn af henni. Þá skellti amma bara í bláa handa honum. Uppskriftin er úr Klompelompe - strikk til hele familien og heitir Småtroll. Stærðin er á 3-6 ára, en aðeins grynnri en uppskriftin segir til um.

 Hann var mjög sáttur með þetta allt eins og sést á myndunum. Ég notaði Drops merino extra fine frá Gallery spuna og prjóna nr. 4, og nr. 3,5 og 3 í stroffin. 

Alise finjakke

Fyrir fjórum árum prjónaði ég svona peysur á tvær eldri ömmustelpurnar. Önnur þeirra notaði sína peysu sérlega mikið, og man ég eftir henni í henni bara fyrir nokkrum mánuðum. En þær peysur voru prjónaðar í stærð fyrir tveggja ára, og stelpurnar verða sex ára í sumar! Ótrúlegt hvað peysan hefur enst lengi á henni.

Þess vegna skellti ég í aðra og hafði hana á sex ára að þessu sinni. Notaði sama garn og síðast, Mandarin petit, sem kemur mjög vel út í þessum peysum.

Bakstykkið er alveg sérlega fallegt og gaman að prjóna það. Þessi peysa er mjög fín yfir alls konar kjóla. Uppskriftin er úr Klompelompe, strikk året rundt. Ég tek það fram að peysan er snjóhvít, en einhvern veginn varð hún það ekki á myndunum, sama hvað ég reyndi.