Strákavesti

Ég prjónaði vesti á ömmustrákinn eina til að vera í yfir hátíðirnar. Hann hefur gaman af því að vera fínn og herralegur.

Ég studdist við uppskriftina Smáravesti frá Ömmu Loppu að mestu leyti, en breytti stroffunum þannig að ég hafði eina og eina í stað þess að hafa tvær sléttar og tvær brugðnar. Með því móti gat ég haft fallega úrtöku í vaffinu í stað þess að leggja á misvíxl og sauma niður eins og uppskriftin gerir ráð fyrir.

 Ég fitjaði upp á stærð 5-6 ára, en drengurinn er fimm ára síðan í haust, og hafði síddina nær 6-8 ára stærðinni, því hann er frekar langur. 

Garnið er Dale Lille Lerke, blanda af ull og bómull, og prjónastærðin var nr. 4.

Sumarvesti - Gurinevest

Ég er nýbúin að prjóna sumarvesti á ömmuskvísurnar mínar þrjár. Þær vildu allar þennann sama bleika lit, sem var bara fínt þangað til ég ætlaði að kaupa hann. Liturinn er nefnilega hættur í framleiðslu. Hvergi neitt til af honum nema örfáar dokkur með ólík lotunúmer á þeim stöðum sem ég tékkaði á, og þar var sko allt landið undir. En mér tókst þó að lokum að finna verslun á stórhöfuðborgarsvæðinu, sem gat bjargað mér.

Bakið á vestunum er mjög skemmtilegt i laginu, og ekki síður gaman að prjóna það. Þau pössuðu vel á allar stelpurnar, ég valdi stærðir á sex og átta ára, en þær eru fimm og sjö ára.

Uppskriftin er úr Klompelompes sommerbarn og heitir Gurinevest. Garnið er Drops cotton merino og prjónastærðin er 3 og 3,5.

 
 

Vesti

 Þetta vesti fékk lítill frændi minn sem fæddist í lok nóvember. Það var prjónað á ömmustrákinn minn fyrir jólin en reyndist of lítið og gerði ég annað á hann sem ég sýni hér aðeins neðar á síðunni. Stærðin er fyrir 12-18 mánaða, en nokkuð þétt prjónað hjá mér. Garnið er Drops baby merino og uppskriftin er frá Garnstudio.

Vesti

Þetta verður jólavesti á litla 15 mánaða ömmustrákinn minn. 

Fyrst gerði ég stærð á 12-18 mánaða en það varð alltof lítið á alla kanta. Sennilega hef ég prjónað það of fast, mér hættir til þess. Svo ég prjónaði annað, þetta á myndinni, og notaði stærð á tveggja ára og prjónaði lausar, á alveg von á að þetta smellpassi. Verður fínt með hvítri skyrtu og slaufu.

Ég var svo heppin að eignast lítinn frænda fyrir nokkrum dögum og ætla að klára minna vestið fyrir hann.

Ég notaði tvær dokkur af Drops baby merino.

Uppskriftin er frá Garnstudio.com.

Vesti

Það var kominn tími til að ömmustrákurinn, sem verður átta mánaða eftir 4 daga, fengi nýtt vesti.

Hann getur reyndar ennþá notað þau sem ég prjónaði í þriggja mánaða stærð, því þau teygjast.

Uppskriftin að þessu heitir NORD-vest og er frá hyggestrikk.dk.

Það er á níu mánaða.

Garnið er Lanett frá Sandnes, og prjónarnir nr. 3,5.

Vesti

Þegar elstu ömmustelpurnar mínar fæddust prjónaði ég á þær Lillies top.

Tengdadóttir mín bað mig um að prjóna vesti á litla soninn með sama munstri, sem ég gerði með gleði.

Ég hafði það styttra og án þess að taka inn í hliðunum.

Stærðin er á 0-3 mánaða, en svona vesti vaxa aðeins með börnunum.

Ég er farin að safna vestisuppskriftum núna til að eiga handa honum fyrir næstu ár. Mér finnast strákar svo fínir í vestum og svo er þetta svo hlýtt.

Viggos vest

Ég prjónaði vesti á litla ömmustrákinn til að nota núna í haust, þegar kólnar í veðri.

Uppskriftin er í Babystrik på pinde 3, 1. hefti.

Stærðin er á 0-3 mánaða og ég prjónaði úr Lanett.

 

Hér kúrir hann í vestinu, og er í sokkum af systur sinni.  Þeir eru reyndar að verða of litlir á hann, svo amma prjónar bara stærri.

Skírnargjöf

Lítill vinur, sem tengist mér fjölskylduböndum, var skírður um hvítasunnudag.

Af því tilefni prjónaði ég þessar flíkur á hann.

Allar uppskriftirnar eru úr Klompelompe bókunum.

Garnið er Drops baby merino, og í lambhúshettuna notaði ég með því Drops merino extra fine.

Peysan og vestið eru á eins árs, en lambhúshettan á 6 mánaða.

Bella top

Lítil frænka mín varð 5 ára í júní.  Ég prjónaði handa henni skokk í afmælisgjöf.

Uppskriftin er úr bókinni Børnestrikk på pinde nr. 3,5-4 og heitir Bella top.  

Garnið heitir Sandnes Alpakka.  Stærðin er á 6 ára.

Lillies top

 

Ég gerði Lillies top í stærð 0-3 mánaða á ömmustelpurnar áður en þær fæddust, og þeir eru næstum notaðir upp til agna núna og orðnir of litlir, svo nýjir voru pantaðir.

Ég notaði sama garn, Englaull frá Litlu prjónabúðinni, foreldrarnir völdu litina, og stærðin er á 6-12 mánaða.

Uppskriftin er úr Babystrikk på pinde 3.

Á þessari mynd eru litirnir réttari en á þeirri efri.

 

Posted with Blogsy

Lillies Top

Um leið og ég vissi að barnabörnin mín yrðu stúlkur, fór ég og keypti garn í Lillies Top. Mig langaði mjög að prjóna þessa uppskrift, en mér finnst hún bara passa á stelpur. Ég gerði minnstu stærðina, 0-3 mánaða, og þær fóru báðar í þetta nýfæddar, og þá voru þetta eins og kjólar, en verða svo smart sem toppar með gammósíum í vetur.

Garnið heitir Engleull og fæst í Litlu prjónabúðinni, og uppskriftin er úr bókinni Babystrikk på pinde 3, sem fæst í sömu búð.

Svo þakka ég ykkur falleg komment í síðustu færslu, sem senduð mér þau :)

 

Posted with Blogsy

Vesti á eiginmanninn

Fyrir löngu síðan bað eiginmaðurinn mig að prjóna á sig vesti. Ég mundi eftir að hafa séð vestisuppskriftir úr fínu garni fyrir mörgum árum, en fann engar lengi vel. Þá var ég svo heppin að rekast á réttu uppskriftina á blogginu Elsku mamma, og lauk við vestið í byrjun ágúst. Garnið er Sisu og uppskriftin er í þessu blaði.

Posted with Blogsy

Vesti

Þetta vesti prjónaði ég fyrir nokkrum vikum. Það er úr Lopa og bandi, nýja blaðinu sem gefið var út í haust.

Í stroffið er notaður tvöfaldur plötulopi, en í bolinn einfaldur plötulopi og einband.

Vesti úr lopa

Þetta vesti var ég að ljúka við. Fann uppskriftina á þessu bloggi, og er hún frá Garnstudio. Uppskriftin gerir ráð fyrir að þetta sé toppur úr bómullargarni á prjóna nr.4,5, svo ég ákvað að prófa hana í léttlopa.

Reyndar prjónaði ég bolinn öðruvísi, tók inn í mittið og jók aftur út. Uppskriftin er víðari.

Hér eru svo 40 bútar í innri kantinn á stjörnuteppinu og 4 bútar í hornin.