Dagens gjestebloggar!

Det vert nok ikkje daglegdags at det dukkar opp gjestebloggarar her, men størstejenta på 11 år har veldig lyst til å vise fram sitt splitter nye mobiletui. Her har ho gjort alt sjølve: laga mønster, klipt delar og sydd saman, kun med litt veiledning frå meg. Bileta har ho også redigert sjølve. Er ho ikkje flink?

Dette skriv Emma: "Ein dag då eg ikkje hadde noko å gjere på, foreslo mamma at eg kunne lage mobiletui. Det gjorde eg og. Og eg er skikkelig fornøyd med resultatet! Det ser faktisk ut som at mamma har lagd det! Det har strikk til å lukke med og ein krok til å henge det på litt forskjellige plasser..."

Kvifor stoppe etter berre éin...

...tenkte eg, og dermed vart fleire pengepungar sydd.

Dei to minste her er endå mindre enn den med uglene, medan den største er nesten som ein liten sminkepung.

Alle desse har eg lagt ut for sal på Epla.no medan eg tenkjer på om eg skal behalde den eine sjølve...

Ei bittelita gåve....

... til ei veldig god venninne som står på reisefot/flyttefot og difor kanskje ikke hadde vorte så glad for å få ein diger lysestake eller nytt kaffiservise til bursdagen.

Difor altså ein liten pengepung. Uheldigvis den første eg nokon gong har sydd, så den har litt av det me kan kalle skjønnheitsfeil. I alle fall fant eg ut litt av kva eg må gjere annleis neste gong.

Ugler frå textart.no, orange blomstrar og svart fôr frå S&S.

Grab bag

Sist torsdag tok eg med meg symaskina og køyrde til Askøy på “sytreff”. Tok med meg mønster og stoff til ein type veske eg hadde lyst å prøve ut, og dette vart altså resultatet; ei enkel “poseveske” som også kan brukast med innsida ut.

 

 

Her har eg prøvd meg på noko eg ikkje mestrar i det heile; bilderedigering i Photoshop! Har tatt vekk bakgrunnen på bildet. Ikkje heilt nøgd med resultatet, men håpar på at øving gjer meister…

 

 

 

Forresten så var den nemde sykvelden veldig koselig. Var litt spent på dét, sidan eg ikkje kjende nokon av dei andre anna enn frå forumet Sykroken.net. Me var 6 stk som brukte kvelden til å sy på kvart vårt prosjekt, skravle, og sette til livs deilige muffins. Veldig kjekt og inspirerande!